Muqdisho (Banaadir24) — Taliyihii hore ee Hay’adda Nabad-sugidda iyo Sirdoonka Qaranka (NISA), Fahad Yaasiin Xaaji Daahir, ayaa digniin culus ka soo saaray jihada siyaasadeed ee Soomaaliya, isaga oo Madaxweyne Xasan Sheekh Maxamuud ku eedeeyay inuu dalka u horseedi karo xaalad la mid ah tan ka taagan dalka Suudaan.
Fahad Yaasiin, oo qoraal uu soo saaray kaga hadlay xaaladda siyaasadeed ee dalka, ayaa sheegay inuu ka cabsi qabo in Soomaaliya ay gasho xaalad ay ka jiraan laba madaxweyne, laba dowladood iyo laba ciidan, isaga oo tusaale u soo qaatay khilaafka u dhexeeya hoggaamiyeyaasha milatariga Suudaan, Cabdifitaax Al-Burhaan iyo Maxamed Xamdaan Daqlo (Xamayiiti).
Sidoo kale, Fahad Yaasiin ayaa ku eedeeyay dowlad shisheeye inay Madaxweyne Xasan Sheekh ku dhiirrigelisay inuu xilka sii joogo, isaga oo ku dooday in arrintaasi ay qayb ka tahay qorshe lagu sii kala fogeynayo shacabka Soomaaliyeed. Hase yeeshee, ma uusan magacaabin dowladda uu eedeynta u jeediyay, mana uusan soo bandhigin caddeyn uu ku taageerayo sheegashadiisa.
“Dowlad shisheeye ayaa ka dhaadhicisay kursiga haka kicin, iyagoo uga dan leh in Soomaali lasii kala fogeeyo,” ayuu Fahad Yaasiin ku yiri qoraalkiisa.
Wuxuu intaas ku daray in damaca uu ka hadlayo uusan hirgeli doonin, isaga oo hadalkiisa ku soo gabagabeeyay rajo uu ka muujiyay in Soomaaliya ay ka badbaadi doonto kala qeybsanaan siyaasadeed iyo mid ciidan.
Hadalkan ayaa kusoo beegmaya xilli ay Soomaaliya ka jiraan khilaafyo siyaasadeed oo la xiriira hoggaanka dalka, awood-qaybsiga iyo mustaqbalka hannaanka dowladnimada, kuwaas oo sii kordhinaya doodda ku saabsan jihada uu dalku wajahayo.
