Muqdisho (Banaadir24) — Guddoomiyaha cusub ee degmada Buurhakaba ee uu magacaabay Madaxweynaha Koonfur Galbeed, Cabdicasiis Xasan Maxamed Laftagareen, iyo Wasiirka Amniga ee maamulkiisa ayaa ku dhawaaqay cafis loo fidinayo maxaabiistii lagu qabtay dagaalkii shalay ka dhacay degmada Buurhakaba ee gobolka Baay.
Cafiskan ayaa lagu dhawaaqay kaddib dagaallo dhexmaray ciidamo ka tirsan Daraawiishta taabacsan Laftagareen iyo ciidamo la safan Dowladda Federaalka Soomaaliya, kuwaas oo kusoo beegmay xilli ay sii xoogeysanayaan xiisadaha siyaasadeed iyo kuwa milatari ee ka jira Koonfur Galbeed.
Go’aankan ayaa loo soo bandhigay tallaabo lagu doonayo in lagu dhiirrigeliyo dib-u-heshiisiinta kaddib dagaalladii ka dhacay degmada Buurhakaba.
Dhanka kale, xaaladda siyaasadeed iyo amni ee gobolka Baay ayaa weli ah mid xasaasi ah, iyadoo dagaallada iyo loollanka u dhexeeya dhinacyada iska soo horjeeda ay sii kordhinayaan walaaca laga qabo xasilloonida deegaanka.
Banaadir24 Online
