Muqdisho (Banaadir24) — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa kormeer shaqo ku tagay markabka shidaal-qodista ee Çağrı Bey, kaas oo ku sugan biyaha Soomaaliya, kana wada hawlgallo lagu baarayo laguna qodayo shidaalka dalka.
Madaxweynaha ayaa intii uu ku guda jiray booqashada waxaa warbixin ka siiyay khubarada iyo mas’uuliyiinta markabka, kuwaas oo faahfaahin ka bixiyay hawlaha ilaa hadda la qabtay, natiijooyinka laga gaaray qodista iyo xogta hordhaca ah ee laga helay howlgalka.
Kormeerkan ayaa qayb ka ah dadaallada dowladda Soomaaliya ay ku doonayso inay ku xaqiijiso khayraadka shidaal ee ku jira biyaha dalka, iyadoo hawlgallada socda ay muhiim u yihiin ogaanshaha awoodda shidaal ee Soomaaliya.
Dowladda Federaalka Soomaaliya ayaa rajaynaysa in ka faa’iidaysiga khayraadka dabiiciga ah uu mustaqbalka door ka qaato kobcinta dhaqaalaha dalka iyo kordhinta dakhliga qaranka.
