10 askari oo mar qura kuwada geeriyootay qarax miino & Wararkii ugu dambeeyay
Wararka laga helayo gobolka Bari ayaa sheegaya in in ka badan 10 askari oo ka tirsan ciidamada Puntland lagu dilay qarax miino oo maanta ka dhacay deegaanka Sheebaab ee degmada Qandala.
Sida ay sheegeen ilo amni iyo dad deegaanka ah, gaari ciidan oo ay saarnaayeen askarta ayaa dul maray miino nooca dhulka lagu aaso taasoo dhalisay qarax xooggan oo gabi ahaanba burburiyay gaariga.
Wararka hordhaca ah ayaa tilmaamaya in dhammaan askartii saarneyd gaariga ay ku dhinteen qaraxa, inkastoo tirada rasmiga ah ee khasaaraha aan weli si madax-bannaan loo xaqiijin, isla markaana maamulka Puntland uusan weli soo saarin war rasmi ah oo faahfaahsan.
Ma jirto koox si rasmi ah u sheegatay mas’uuliyadda weerarka, hase yeeshee dhacdadan ayaa ka dhacday deegaan ay ciidamada Puntland muddo dheer ka wadeen howlgallo ka dhan ah kooxda Daacish, oo weli adeegsata miinooyinka dhulka lagu aaso, weerarada gaadmada ah iyo xeeladaha dhuumaaleysiga.
Dhacdadan ayaa noqon karta mid ka mid ah weerarradii ugu khasaaraha badnaa ee ciidamada Puntland kasoo gaara qarax miino tan iyo billowgii howlgalka ballaaran ee ka dhanka ah Daacish.
