Marka (Banaadir24) — Wararka hordhaca ah ee laga helayo magaalada Marka ee gobolka Shabeellaha Hoose ayaa sheegaya in weerar hubeysan uu ka dhacay xerada Ayuub, kaas oo sababay dhimasho iyo dhaawac.
Sida ay sheegayaan xogaha hordhaca ah, rag hubeysan oo la sheegay inay ka tirsan yihiin maamulka isku magacaabay Koonfur Bari ayaa weeraray xerada, iyagoo bartilmaameedsaday dad lagu eedeeyey inay ka soo horjeedaan maamulkaas.
Wararka la helay ayaa tilmaamaya in weerarka lagu dilay ugu yaraan hal qof, kaas oo la sheegay in lagu toogtay qori nooca dabajeexa ah. Sidoo kale, waxaa la sheegay in dad kale ay goobta ka baxsadeen intii uu weerarku socday.
Raggii weerarka geystay ayaa la sheegay inay goobta isaga baxeen kaddib falka, mana jiraan warar la xaqiijiyey oo sheegaya in dad loo soo qabtay weerarka.
Dhacdadan ayaa kusoo beegmaysa iyadoo magaalada Marka ay ka taagan tahay xiisad la xiriirta sheegashada maamulka Koonfur Bari, kaas oo doonaya inuu magaalada ka taliyo, halka Marka ay ka mid tahay deegaannada uu maamulo maamulka Koonfur Galbeed Soomaaliya.
