Mudanayaasha Golaha Shacabka ee Baarlamaanka Federaalka Soomaaliya ayaa xarunta Golaha Shacabka ku yeeshay kalfadhiga 8-aad, kulankiisa 25-aad, waxaana shir guddoominayey Guddoomiyaha Golaha Shacabka ee Baarlamaanka Federaalka Soomaaliya Mudane Cabdulqaadir Maxamed Nuur (Jaamac) oo uu wehliyo Guddoomiye kuxigeenka labaad ee Golaha Shacabka Mudane Cabdullaahi Cumar Abshirow.
Ugu horreyn Xildhibaanada Golaha Shacabka ayaa Akhrinta koowaad marsiiyey Hindse-Sharciyeedka Reebidda naafeynta Xubinta Taranka Dhedigga oo ay soo diyaarisay Wasaaradda Qoyska iyo Horumarinta Xuquuqul Insaanka, waxaana warbixinta Akhrinta koowaad ee Hindise-Sharciyeedkan Golaha la wadaagtay Wasiirka Wasaaradda Qoyska iyo Horumarinta Xuquuqul Insaanka Marwo Khadiija Maxamed Al-Makhzoumi.
Sidoo kale,mudanayaasha Golaha Shacabka ee Baarlamaanka Federaalka Soomaaliya ayaa Akhrinta koowaad marsiiyey Heshiiska Qaramada Midoobay ee ka ganacsiga Sharci-darada ah ee Daawooyinka Maanka dooriya iyo kuwa maanka saameeya.
Dhinaca kale, mudanayaasha Golaha Shacabka ee Baarlamaanka Federaalka Soomaaliya ayaa loo qeybiyey Warbixinta Akhrinta sedaxaad ee Hindise-Sharciyeedka Wax-ka-baddelka Sharciga Bankiga Dhexe ee Soomaaliya, Sharci Lr.130 ee soo baxay April-2012 iyo Warbixinta Akhrinta sedaxaad ee Heshiisyada u dhaxeeya Soomaaliya iyo Turkiga ee ku saabsan Iskaashiga Caalamiga ah ee Garsoorka.
Ugu dambeyn, Guddoomiyaha Golaha Shacabka ee Baarlamaanka Federaalka Soomaaliya Mudane Cabdulqaadir Maxamed Nuur (Jaamac) oo kulanka soo xiray ayaa sheegay in Hindse-Sharciyeedka Reebidda naafeynta Xubinta Taranka Dhedigga iyo Heshiiska Qaramada Midoobay ee ka ganacsiga Sharci-darada ah ee Daawooyinka Maanka dooriya iyo kuwa maanka saameeya ay ka gudbeen marxaladda Akhrinta koowaad, isagoo faray Xoghayaha Guud ee Golaha Shacabka inuu ku wareejiyo Guddiyada ku shaqada leh, si ay usoo diyaariyaan Akhrinta labaad oo ay Golaha dib ugu soo celiyaan.
