Shidaal qodista Soomaaliya oo gashay marxalad muhiim ah & Turkiga oo soo dadajinaya natiijada…
Shirkadda Tamarta Qaranka Turkiga ee TPAO ayaa ku dhow inay soo gabagabeyso qodista ceelka sahminta shidaalka ee Curad-1, oo ku yaalla badda Soomaaliya, iyadoo howlgalka la filayo inuu soo dhammaado dhammaadka September 2026, ku dhowaad hal bil ka hor waqtigii hore loo qorsheeyay.
Agaasimaha Guud ee Hay’adda Batroolka Soomaaliya, Cabdulqaadir Aadan, ayaa sheegay in markabka qodista ee Turkiga ee Çağrı Bey uu gaaray qiyaastii 3,000 mitir oo qodis ah, iyadoo ilaa hadda aan la soo sheegin shilal ama cilado farsamo oo waaweyn.
Ceelka Curad-1 wuxuu ku yaalla qiyaastii 370 KM dhanka badda ah ee Muqdisho, waxaana lagu qodayaa meel biyuhu gaarayaan ku dhowaad 3,500 mitir, halka qoto-dheeraanta guud ee ceelka la qorsheeyay ay gaareyso ku dhowaad 7,500 mitir.
Curad-1 ayaa ah ceelkii ugu horreeyay ee Soomaaliya laga qodo badda, sidoo kalena waa howlgalka ugu horreeya ee qodista badda fog ee TPAO ay ka fuliso meel ka baxsan biyaha Turkiga.
Howlgalka ayaa yimid kaddib markii markabka sahminta Turkiga ee Oruç Reis uu baaritaan ka sameeyay in ka badan 4,464 KM² oo ka tirsan saddex aag oo badeed oo Soomaaliya ah, iyadoo labada dal ay heshiis iskaashi shidaal iyo gaas ah kala saxiixdeen 2024.
Qiyaastii 470 ilaa 480 qof ayaa ka qeyb qaadanaya howlgalka, kuwaas oo ku sugan markabka qodista iyo maraakiibta taageerada ee Altan, Korkut iyo Sancar. Shaqaalaha Turkiga ayaa ka ah ku dhowaad 20% guud ahaan shaqaalaha howlgalka.
Markabka Çağrı Bey ayaa xeebaha Soomaaliya soo gaaray bishii April 2026, iyadoo qorshihii hore uu ahaa in howlgalka qodistu socdo ku dhowaad 288 maalmood.
Haddii natiijada Curad-1 ay noqoto mid wanaagsan, waxay noqon kartaa tallaabo weyn oo lagu ogaanayo kheyraadka shidaal iyo gaas ee ku jira badda Soomaaliya, iyadoo sidoo kale iskaashiga tamarta ee Soomaaliya iyo Turkiga uu u gudbi karo marxalad cusub oo ku wajahan soo saarista shidaalka iyo gaaska.
