Baydhabo (Banaadir24) — Sarkaal lagu magacaabo Cabdille Boorow ayaa ku biiray ciidamada taabacsan madaxweynihii hore ee Koonfur Galbeed, Cabdicasiis Xasan Maxamed (Laftagareen), sida ay Banaadir24 u sheegeen ilo xog-ogaal ah.
Xogta la helay ayaa tilmaamaysa in Cabdille Boorow uu magaalada Baydhabo ka baxay isaga oo wata ku dhowaad 60 askari oo ay isku beel yihiin, kuwaas oo uu la aaday dhinaca ciidamada taabacsan Laftagareen.
Sarkaalka ayaa ka soo jeeda beesha Hadame, waxaana ku biiritaankiisa lagu tilmaamay isbeddel ku soo kordhaya dhaqdhaqaaqyada ciidamada ee ka socda gobolka Baay.
Tallaabadan ayaa ku soo aadaysa xilli ay sii xoogaysanayaan dhaqdhaqaaqyada ciidan ee ay wadaan xoogagga taabacsan Laftagareen, kuwaas oo maalmihii u dambeeyay la wareegay deegaanno ku dhow magaalada Baydhabo.
Ilaa hadda ma jiraan faahfaahin dheeraad ah oo laga helay xilka rasmiga ah ee Cabdille Boorow ama halka ay ciidamadiisu saldhig ka dhigan doonaan.
