Muqdisho (Banaadir24) — Madaxweynihii hore ee Soomaaliya, Maxamed Cabdullaahi Farmaajo, ayaa maanta oo Jimco ah dib ugu soo laabtay magaalada Muqdisho, xilli ay soo baxayaan warar sheegaya in la qorsheynayo wada-hadallo siyaasadeed oo u dhexeeya Dowladda Federaalka iyo mucaaradka.
Ilo-wareedyo lagu kalsoonaan karo ayaa sheegaya in beesha caalamku ay qorsheynayso in 4-ta November ay qabsoomaan wada-hadallo u dhexeeya Madaxweyne Xasan Sheekh Maxamuud iyo dhinacyada mucaaradka, kuwaas oo ay ku jiraan madaxweynayaashii hore ee dalka iyo hoggaamiyeyaasha Puntland iyo Jubbaland.
Wada-hadalladan la qorsheynayo ayaa la xiriira is-mariwaaga siyaasadeed ee dalka, iyadoo weli ay taagan yihiin doodaha ku saabsan hannaanka doorashooyinka iyo jihada siyaasadeed ee Soomaaliya.
Dhanka kale, haddii wada-hadalladu miro-dhal noqon waayaan, falanqeeyayaasha siyaasadda ayaa qaba in Dowladda Federaalka ay sii wadi karto qorshaheeda doorashooyinka 2027.
Ilaa hadda, faahfaahin rasmi ah oo ku saabsan ajandaha wada-hadallada iyo ka-qaybgalayaasha la xaqiijiyey lagama hayo xogta la soo gudbiyey.
Banaadir24 — Isha wararka Soomaaliya.
