Muqdisho (Banaadir24) — Madaxweynaha Soomaaliya Xasan Sheekh Maxamuud ayaa wajahaya cadaadis diblomaasiyadeed oo xooggan, iyadoo dalal reer galbeed ah iyo saaxiibbo caalami ah ay ku cadaadinayaan inuu heshiis siyaasadeed oo kama dambeys ah la gaaro mucaaradka, si xal looga gaaro khilaafka ka taagan doorashada dalka.
72-kii saac ee lasoo dhaafay ayaa la sheegay in Villa Somalia ay gaareen farriimo toos ah oo ka yimid caasimado reer galbeed ah iyo dalal kale oo xiriir dhow la leh Soomaaliya, kuwaas oo Madaxweyne Xasan Sheekh loogu sheegay muhiimadda ay leedahay in la gaaro heshiis siyaasadeed oo dhinacyada dalka isku soo dhoweeya.
Digniinaha la gaarsiiyey madaxweynaha ayaa la xiriira kulanka soo socda ee Golaha Ammaanka Qaramada Midoobay, iyadoo laga cabsi qabo in haddii aan xal laga gaarin khilaafka siyaasadeed ay kasoo baxaan go’aanno aan u rooneyn dowladda Soomaaliya.
Dhanka kale, gogosha wada-hadallada ee Villa Somalia ay qorsheysay 14-ka bishan ayaa wajahaysa caqabad weyn, kaddib markii Puntland iyo Jubbaland la sheegay inay ka baaqanayaan ka qeybgalka kulankaas, iyagoo isla maalmahaas bilaabaya wadatashiyo siyaasadeed oo laga filayo go’aanno xasaasi ah.
Waxaa sidoo kale la sheegay in wasiir qaabilsan arrimaha Afrika oo ka tirsan dowlad reer galbeed ah uu khadka taleefanka kula hadlay Madaxweyne Xasan Sheekh, halka wasiirka arrimaha dibadda ee dalkaas uu qorsheynayo kulan uu madaxweynaha kula yeesho, kaas oo diiradda lagu saarayo khilaafka doorashada iyo baahida loo qabo heshiis lala gaaro mucaaradka.
Dalalka reer galbeedka ayaa sidoo kale walaac ka muujinaya xaaladda amniga Soomaaliya, iyagoo su’aalo ka keenaya natiijada taageerada dhaqaale iyo midda militari ee ay muddada dheer siinayeen dowladda Soomaaliya.
Mareykanka iyo UK ayaa la sheegay inay in ka badan shan bilyan oo dollar ku bixiyeen taageerada amniga Soomaaliya, hase yeeshee weli ay jiraan caqabado waaweyn oo la xiriira awoodda dowladda ee la wareegidda mas’uuliyadda amniga dalka.
Dhanka kale, laba dal oo ka mid ahaa saaxiibbada dhow ee Villa Somalia ayaa la sheegay inay bilaabeen dib-u-eegis ku saabsan xaaladda Soomaaliya, kaddib markii warbixinno walaac leh oo ka yimid Muqdisho ay gaareen caasimadda Turkiga ee Ankara.
Arrimahan ayaa kusoo aadaya xilli dalka uu wajahayo marxalad siyaasadeed oo xasaasi ah, iyadoo khilaafka doorashada, kala aragti duwanaanshaha dowladda iyo mucaaradka, iyo mowqifka dowlad-goboleedyada ay sii kordhinayaan cadaadiska gudaha iyo kan caalamiga ah ee saaran Madaxweyne Xasan Sheekh.
