- Muqdisho (Banaadir24) — Wararka laga helayo deegaanka Ceelasha Biyaha ee duleedka magaalada Muqdisho ayaa sheegaya in dhacdo naxdin leh ay ka dhacday halkaas, kaddib markii wiil dhalinyaro ah lagu eedeeyay inuu dilay hooyadiis.
Sida ay sheegeen dad deegaanka ku nool oo la hadlay warbaahinta, wiilka ayaa la sheegay inuu hooyadiis dhowr jeer mindi kaga dhuftay, taasoo sababtay inay goobta ku geeriyooto.
Goobjoogayaal ayaa sheegay in dadka deegaanka ay goobta yimaadeen, kaddibna ay qaadeen meydka marxuumadda, halka wiilka lagu eedeeyay falka uu markii hore goobta ka baxsaday.
Wararka laga helayo deegaanka ayaa sidoo kale tilmaamaya in wiilka lagu eedeeyay inuu isticmaali jiray maandooriye, balse weli si rasmi ah looma xaqiijin in arrintaasi ay xiriir la leedahay dhacdada.
Ciidamada ammaanka ayaa la sheegay inay gaareen goobta, isla markaana ay bilaabeen baaritaanno ku saabsan dhacdadan. Wararka qaar ayaa sheegaya in wiilka la tuhunsan yahay la qabtay, hase yeeshee weli ma jiro war rasmi ah oo arrintaas xaqiijinaya.
Dhacdadan ayaa naxdin ku abuurtay bulshada ku dhaqan Ceelasha Biyaha, iyadoo la sugayo faahfaahin dheeraad ah oo ka soo baxda laamaha ammaanka.
Banaadir24 Online — Wararka Soomaaliya iyo caalamka
