Muqdisho (Banaadir24) — Maamulka Koonfur Galbeed Soomaaliya ayaa warqad furan u diray Beesha Caalamka, Qaramada Midoobay, Midowga Afrika iyo shacabka Soomaaliyeed, isaga oo walaac xooggan ka muujiyey duqeymo dhanka cirka ah oo uu sheegay inay diyaaradaha dagaalka ee Turkigu ka fuliyeen gobollada Bay iyo Bakool.
Qoraalka kasoo baxay Madaxtooyada Koonfur Galbeed ayaa lagu sheegay in diyaaradaha aan duuliyaha lahayn ee Bayraktar TB2 iyo diyaaradaha dagaalka ee F-16 ee Turkiga ay duqeymo ka geysteen magaalooyinka Baydhabo iyo Waajid, kuwaas oo maamulkaasi ku eedeeyey inay sababeen dhimasho iyo dhaawac soo gaaray dad rayid ah, iyo burbur hantiyeed oo saameeyey guryo, xoolo iyo dhul-beereed.
Maamulka Koonfur Galbeed ayaa ku dooday in duqeymahaasi aysan ku koobnayn la-dagaallanka kooxda Al-Shabaab, balse ay qayb ka yihiin olole siyaasadeed oo lagu bartilmaameedsanayo dadka ka aragti duwan dowladda federaalka. Waxa uu sidoo kale tusaale u soo qaatay dhacdo uu ku tilmaamay isku-day dil oo ka dhacay degmada Doolow, kaas oo lagu bartilmaameedsaday Jeneraal Shub.
Eedeymo loo jeediyey dowladda federaalka iyo Turkiga
Warqadda ayaa eedeymo culus loogu jeediyey Madaxweynaha Soomaaliya Xasan Sheekh Maxamuud, Wasiirka Gaashaandhigga Cabdulqaadir Maxamed Nuur iyo dowladda Turkiga, iyadoo maamulka Koonfur Galbeed uu ku dooday in falalka uu sheegay inay dhaceen ay jebin karaan shuruucda caalamiga ah ee ilaalinta dadka rayidka ah xilliyada colaadaha.
Maamulka ayaa sidoo kale soo hadal qaaday muddo-xileedka Madaxweynaha, isaga oo ku dooday in muddo-xileedkiisu ku ekaa 15-kii May 2026, isla markaana su’aal geliyey sharciyadda hawlgallada milatari ee uu sheegay in laga fulinayo deegaannada Koonfur Galbeed.
Dhanka kale, qoraalka ayaa tixraacaya heshiisyada Geneva iyo qodobka 8-aad ee Xeerka Rome, kuwaas oo la xiriira shuruucda dagaalka iyo dambiyada dagaal. Hase yeeshee, in fal gaar ahi sharci ahaan noqonayo dembi dagaal waxay ku xiran tahay xaqiiqooyinka la helo iyo baaritaan sharciyeed.
Dalabaadka Koonfur Galbeed
Maamulka Koonfur Galbeed ayaa warqaddiisa ku soo bandhigay dalabaad dhowr ah oo ay ka mid yihiin:
1. In la joojiyo duqeymaha: Maamulka ayaa dowladda Turkiga ugu baaqay inay si degdeg ah u joojiso hawlgallada cirka ee uu sheegay inay ka socdaan deegaannada Koonfur Galbeed.
2. Baaritaan madax-bannaan: Waxa uu Beesha Caalamka, Qaramada Midoobay, Midowga Afrika, Midowga Yurub iyo dowladda Mareykanka ka codsaday inay sameeyaan baaritaan madax-bannaan oo lagu xaqiijinayo dhacdooyinka la sheegay, isla markaana lala xisaabtamo cid kasta oo lagu helo inay sharciga jebisay.
3. Baaq ku socda mucaaradka iyo maamul-goboleedyada: Maamulka ayaa madaxda maamul-goboleedyada iyo kooxaha mucaaradka ugu baaqay inay ka falceliyaan waxa uu ku tilmaamay faragelin iyo tallaabooyin militari oo ka dhan ah deegaannada Koonfur Galbeed.
4. Diiwaangelinta waxyeellada: Waxa uu hay’adaha xuquuqda aadanaha iyo kuwa xaqiiqo-raadinta ugu baaqay inay diiwaangeliyaan waxyeellada la sheegay inay ka dhalatay duqeymaha, si loo helo xog lagu kalsoonaan karo oo saldhig u noqon karta baaritaan.
Koonfur Galbeed oo ka digtay in rayidka la waxyeelleeyo
Maamulka ayaa qoraalkiisa ku adkeeyey in awoodda milatari aysan cidna ka sarreysiin karin sharciga, isaga oo sheegay in shacabka Koonfur Galbeed aan loo adeegsan karin cabsi-gelin ama cadaadis siyaasadeed.
