Muqdisho (Banaadir24) — Dowladda Federaalka Soomaaliya ayaa ciidamo xooggan oo ka kala tirsan cutubyada kala duwan ee Ciidanka Xoogga Dalka u dirtay degmada Buurhakaba ee gobolka Baay, iyadoo la filayo in halkaasi laga bilaabo dhaq-dhaqaaqyo ciidan oo lagu doonayo in dib loogu qabsado deegaannada ay dhowaan la wareegeen ciidamada taabacsan Laftagareen.
Ciidamada la diray ayaa la sheegay inay isugu jiraan kuwa Gorgor, Danab, Haramcad, ciidanka gaarka ah iyo guutooyin ka tirsan qaybaha 60-aad iyo 12-ka Abriil ee Ciidanka Xoogga Dalka Soomaaliyeed.
Wararka la helayo ayaa sheegaya in ciidamadu wataan hub noocyo kala duwan leh, gaadiid gaashaaman iyo madaafiicda loo adeegsado duqaymaha dhulka. Tirada ciidamada ayaa lagu sheegay kumannaan askari, inkasta oo aan tiro rasmi ah oo madax-bannaan la xaqiijin.
Diyaarinta ciidamadan ayaa la sheegay inay qaadatay toddobaadyo, iyadoo saraakiisha Ciidanka Xoogga Dalka la sheegay inay ugu dambayn xaqiijiyeen dhaq-dhaqaaqa ciidanka.
Buurhakaba ayaa la filayaa inay noqoto mid ka mid ah meelaha ugu horreeya ee diiradda lagu saaro howlgalka, kaddib markii maamulka Koonfur Galbeed uu hore u shaaciyey qorshayaal la xiriira dib ula wareegidda deegaannada ay maamulkiisa ka baxeen.
Si kastaba, weli ma jiraan faahfaahin rasmi ah oo si madax-bannaan u xaqiijinaysa waqtiga uu howlgalka bilaabanayo, tirada ciidanka ama natiijada laga filayo.
