Muqdisho (Banaadir24) — Wasaaradda Warfaafinta, Dhaqanka iyo Dalxiiska Soomaaliya ayaa si kulul uga hadashay warar been abuur ah oo lagu baahiyey barta X, kaas oo lagu isticmaalay sawirrada saxafiyiin Soomaaliyeed.
Wasaaradda ayaa sheegtay in akoon lagu magacaabo “Counter Terrorism Policing KE” uu baahiyey qoraallo ay ku jiraan eedeymo aan sal iyo raad lahayn oo loo jeediyey saxafiyiin caan ah iyo shakhsiyaad baraha bulshada ku leh saameyn.
War-saxaafadeedka ayaa lagu caddeeyey in eedeymahaasi yihiin kuwo been abuur ah oo lagu doonayo in lagu dhaawaco sumcadda saxafiyiinta, lagu wiiqo xorriyaddooda hadalka, isla markaana khatar lagu geliyo ammaankooda.
Wasaaradda ayaa sidoo kale sheegtay in iyadoo la kaashanaysa hay’adaha ay khusayso ay baaritaan ku waddo akoonkaasi iyo dadka ka dambeeya, si tallaabo sharci ah looga qaado cid kasta oo ku lug leh faafinta xogta marin-habaabinta ah.
Dowladda Federaalka Soomaaliya ayaa mar kale adkaysay inay ka go’an tahay ilaalinta xuquuqda, sharafta iyo amniga saxafiyiinta Soomaaliyeed.
