Muqdisho (Banaadir24) — War culus ayaa ka soo kordhay dagaalkii shalay galab ka qarxay deegaanka Jameeco ee duleedka Leego, gobolka Shabeellaha Hoose, kaddib markii kooxda Al-Shabaab ay soo saartay warsaxaafadeed ay ku sheegatay inay khasaare xooggan gaarsiisay kolonyo ay wateen ciidanka dowladda federaalka Soomaaliya oo ay dagaal la gashay.
Al-Shabaab ayaa sheegatay in dagaalka, oo ay ku tilmaantay mid socday in ka badan saddex saacadood, ay ku dishay 321 askari, halka tiro intaas ka badan ay dhaawacmeen. Kooxdu waxay sidoo kale sheegatay in ciidamadii ay la dagaallameen ay wateen ku dhowaad 110 gaari oo dagaal iyo gaadiid kale oo ciidan.
Warsaxaafadeedka ayaa lagu sheegay in dagaalyahannada Al-Shabaab ay gacanta ku dhigeen gaadiid gaashaaman, tikniko, gawaari xamuul ah, hub iyo saanad ciidan oo ay sheegeen inay ka qabsadeen kolonyada.
Kooxdu waxay sidoo kale sheegatay in dagaalka ay qayb ka ahaayeen diyaaradaha F-16 iyo diyaaradaha aan duuliyaha lahayn ee ay ku tilmaantay kuwa Turkiga, kuwaas oo ay sheegtay inay taageero siinayeen ciidamada dhulka.
Al-Shabaab ayaa intaas ku dartay in dagaalku ka dhacay aagga u dhexeeya Leego iyo Jameeco, isla markaana ay weli faahfaahin dheeraad ah ka soo gudbin doonto dhacdada.
Si kastaba, sheegashooyinka ku saabsan 321-ka askari ee la dilay, khasaaraha kale iyo gaadiidka la qabsaday weli si madax-bannaan looma xaqiijin. Xaaladda dhabta ah ee dagaalka iyo khasaaraha labada dhinac ayaa sugaya warar dheeraad ah oo lagu kalsoonaan karo.
