Buurhakaba (Banaadir24) — Guddoomiyaha degmada Buurhakaba ee maamulka Koonfur Galbeed ee uu hoggaamiyo Cabdicasiis Xasan Maxamed Laftagareen, Cabdullaahi Shaleetey, ayaa dowladda Turkiga ku eedeeyay inay maanta magaalada ka fulisay saddex duqeyn oo uu sheegay in lagu beegsaday xaafado ay dad rayid ahi deggan yihiin iyo kaabayaal muhiim ah.
Shaleetey oo shir jaraa’id ku qabtay Buurhakaba ayaa cambaareeyay duqeymaha uu sheegay inay ka dhaceen magaalada, isaga oo ku tilmaamay kuwo halis gelinaya nolosha dadka rayidka ah. Waxa uu sidoo kale ku eedeeyay diyaaradaha aan duuliyaha lahayn ee Turkiga inay shalay duqeeyeen iskuul ku yaalla degmada.
Guddoomiyaha ayaa intaas ku daray in buundo muhiim ah oo isku xirta Buurhakaba iyo Muqdisho ay ka mid ahayd goobaha la beegsaday, isaga oo ka digay in weerarradaasi ay saameyn ku yeelan karaan amniga shacabka iyo isku socodka gaadiidka.
Dhanka kale, Shaleetey ayaa Turkiga ku eedeeyay inuu faragelin ku hayo arrimaha siyaasadeed ee gudaha Soomaaliya, isla markaana uu taageero siinayo Madaxweyne Xasan Sheekh Maxamuud, xilli uu sii xoogeysanayo khilaafka u dhexeeya Dowladda Federaalka Soomaaliya iyo maamulka Koonfur Galbeed ee uu hoggaamiyo Laftagareen.
Guddoomiyaha ayaa ugu baaqay Qaramada Midoobay, Midowga Yurub iyo Jaamacadda Carabta inay baaritaan ku sameeyaan eedeymaha la xiriira duqeymaha, isaga oo sheegay in weerarrada ay fulinayaan diyaaradaha Turkiga ay noqdeen kuwo soo noqnoqda.
“Ciidamada Daraawiishta Koonfur Galbeed ma aha Al-Shabaab. Waxaan nahay dagaalyahanno xorriyad u dagaallamaya,” ayuu yiri Shaleetey.
Eedeymahan ayaa imanaya xilli ay sii xoogeysanayaan xiisadaha siyaasadeed iyo kuwa milatari ee ka taagan maamulka Koonfur Galbeed, gaar ahaan khilaafka u dhexeeya dhinacyada taageersan Laftagareen iyo Dowladda Federaalka Soomaaliya.
Si kastaba ha ahaatee, sheegashooyinka ku saabsan saddexda duqeyn, iskuulka iyo buundada la sheegay in la beegsaday weli waxay u baahan yihiin xaqiijin madax-bannaan.
