Muqdisho (Banaadir24) — Wasiirka Gaashaandhigga Xukuumadda Federaalka Soomaaliya, Axmed Macallin Fiqi, ayaa kulan la yeeshay Safiirka Midowga Yurub ee Soomaaliya, László Máthé, kaas oo diiradda lagu saaray xoojinta iskaashiga dhinacyada difaaca, amniga iyo tayeynta awoodda Ciidanka Xoogga Dalka Soomaaliyeed.
Sida lagu sheegay war kasoo baxay Wasaaradda Gaashaandhigga, labada dhinac ayaa ka wada hadlay sidii loo sii xoojin lahaa xiriirka Soomaaliya iyo Midowga Yurub, gaar ahaan taageerada dadaallada dowladda ee la xiriira la dagaallanka kooxaha argagixisada iyo horumarinta hay’adaha amniga.
Wasiir Fiqi ayaa uga mahadceliyay Midowga Yurub taageerada uu siiyo Soomaaliya, gaar ahaan dhismaha hay’adaha amniga iyo tayeynta awoodda ciidamada qaranka.
Dhankiisa, Safiirka Midowga Yurub, László Máthé, ayaa xaqiijiyay sida Midowga Yurub uga go’an tahay sii xoojinta xiriirka iyo iskaashiga Soomaaliya, gaar ahaan dadaallada lagu xaqiijinayo amniga, xasilloonida iyo horumarka dalka.
Kulankan ayaa kusoo aadaya xilli Soomaaliya ay dadaal ugu jirto xoojinta awoodda ciidamadeeda si ay si buuxda ula wareegaan mas’uuliyadda amniga dalka.
