Muqdisho (Banaadir24) — Ciidanka Xoogga Dalka Soomaaliyeed ayaa maanta bilaabay Hawlgalka Banooda, kaas oo lagu beegsanayo maleeshiyaadka Al-Shabaab ee ku sugan deegaannada Dowlad-goboleedka Koonfur Galbeed Soomaaliya.
War-saxaafadeedka Wasaaradda Gaashaandhigga ayaa lagu sheegay in Kumaandooska Danab ay hawlgal qorshaysan ka fuliyeen duleedka deegaanka Leego ee gobolka Baay, halkaas oo ay isku dhaceen ciidanka dowladda iyo maleeshiyaad ka tirsan Al-Shabaab oo isku dayay inay hor istaagaan dhaq-dhaqaaqa ciidamada.
Wasaaradda ayaa sheegtay in iska horimaadka lagu dilay toddobo xubnood oo ka tirsan Al-Shabaab, halka tiro kale ay ku dhaawacmeen, iyadoo ciidamada dowladda ay sidoo kale la wareegeen hub noocyo kala duwan leh oo ay wateen maleeshiyaadka.
Hawlgalka Banooda ayaa qayb ka ah dadaallada Ciidanka Xoogga Dalka Soomaaliyeed ee lagu baacsanayo xubnaha Al-Shabaab, laguna ciribtirayo joogitaankooda deegaannada Koonfur Galbeed.
Wasaaradda Gaashaandhigga ayaa hambalyo u dirtay ciidamada ka qayb qaatay hawlgalka, iyadoo sheegtay in howlgalka uu ku bilowday guul ay ciidamadu ka gaareen dagaalkii ka dhacay duleedka Leego.
