Muqdisho (Banaadir24) — Ciidamada Daraawiishta Koonfur Galbeed ee taabacsan Madaxweynaha maamulkaas, Cabdicasiis Xasan Maxamed Laftagareen, ayaa la soo sheegayaa inay ku sii jeedaan degmada Buulo Mareer ee gobolka Shabeellaha Hoose, oo qiyaastii 110 KM koonfur-galbeed kaga beegan Muqdisho.
Dhaqdhaqaaqan ciidan ayaa kusoo aadaya xilli ay sii kordhayaan xiisadaha u dhexeeya Dowladda Federaalka Soomaaliya iyo maamulka Koonfur Galbeed, kuwaas oo isku haya arrimo siyaasadeed iyo maamul.
Wararka laga helayo dhaqdhaqaaqa ciidamada ayaa tilmaamaya in tallaabadan ay ciidamada Laftagareen u dhoweyn karto deegaannada xeebaha ee gobolka Shabeellaha Hoose, oo muhiim u ah dhinacyada amniga iyo isku socodka gobolka.
Buulo Mareer ayaa ka mid ah degmooyinka ku yaalla gobolka Shabeellaha Hoose, waxaana dhaqdhaqaaq kasta oo ciidan oo halkaas ka dhaca uu saameyn ku yeelan karaa xaaladda amni ee deegaannada ku dhow.
Si kastaba, weli lama hayo faahfaahin rasmi ah oo xaqiijineysa halka ay ciidamadaasi marayaan iyo tiradooda.
Sidoo kale, Dowladda Federaalka Soomaaliya iyo maamulka Koonfur Galbeed midkoodna weli kama uusan hadlin wararkan, waxaana la sugayaa faahfaahin dheeraad ah oo ku saabsan xaaladda deegaanka.
