Muqdisho (Banaadir24) – Dowladda Burundi ayaa dadajineysa qorshaha ay ciidamadeeda kaga saareyso Soomaaliya, iyadoo dooneysa in bixitaanka ciidamadaasi uu ka horreeyo dhammaadka howlgalka Midowga Afrika ee AUSSOM.
Warbaahinta Africa Intelligence ayaa baahisay warbixin sheegaysa in Burundi ay dedejineyso qorshaha kala bixitaanka ciidamadeeda, xilli mustaqbalka howlgalka AUSSOM uu wajahayo hubanti la’aan la xiriirta dhaqaalaha iyo taageerada saadka.
Burundi ayaa muddo dheer ka mid ahayd dalalka ugu waaweyn ee ciidamada ka jooga Soomaaliya, iyadoo ciidamadeedu qayb ka ahaayeen howlgaladii Midowga Afrika ee AMISOM iyo ATMIS, kuwaas oo taageerayay dowladda Soomaaliya dagaalka ay kula jirto Al-Shabaab.
Qorshaha bixitaanka ciidamada Burundi ayaa kusoo beegmaya xilli howlgalka AUSSOM uu wajahayo caqabado dhaqaale iyo mid saadka ah, iyadoo dalalka ciidamada ku leh Soomaaliya ay ka wada hadlayaan mustaqbalka howlgalka iyo sidii loo xaqiijin lahaa kala-guur amni oo aan dalka gelin firaaq amni.
Sidoo kale, tallaabadan ayaa imaaneysa xilli Uganda ay bilowday kala bixitaanka qaar ka mid ah ciidamadeeda Soomaaliya, taasoo sare u qaadday walaaca laga qabo mustaqbalka ciidamada Midowga Afrika ee dalka ku sugan.
Ilaa hadda ma jiraan faahfaahin rasmi ah oo si cad u qeexaysa tirada ciidamada Burundi ee la saarayo iyo jadwalka kama dambaysta ah ee bixitaankooda.
