Muqdisho (Banaadir24) — Warar cusub ayaa ka soo baxaya dagaalkii Isniintii ka dhacay deegaanka Leego ee gobolka Shabeellaha Hoose, iyadoo la sheegay in boqolaal askari aan weli la hayn xog rasmi ah oo ku saabsan halka ay ku sugan yihiin.
Sida aan xogta ku helnay, askar badan oo dagaalka ku lug lahayd ayaa weli la la’yahay, waxaana ragga la la’yahay la sheegay inuu ku jiro taliye ku xigeen ka tirsanaa ururka ciidanka dagaalka galay.
Warbixinta ayaa sidoo kale sheegaysa in qaar ka mid ah ciidamadii dagaalka ku dhumay ay shalay mar kale dagaal galeen, iyadoo ay weli taagan tahay su’aasha ku saabsan gurmadka iyo baadigoobka askarta la la’yahay.
Ilaa hadda, sida ay sheegtay warbixintu, ma jirto gurmad rasmi ah oo la xaqiijiyey oo lagu baadi-goobayo askarta maqan, inkastoo laba maalmood ay ka soo wareegeen dagaalka.
Dhanka kale, waxaa la sheegay in ciidamadii kale ay dib ugu laabteen saldhigga Ballidoogle, arrintaas oo dhalisay su’aalo ku saabsan halka uu ku dambeeyey qorshihii duullaanka ee ku wajahnaa degmada Buurhakaba.
Waxay su’aal ka taagantahay sida ay dowladda uga jawaabtay khasaaraha la sheegay inuu ka dhashay dagaalka iyo sababta aan weli si cad looga hadlin qorshihii hawlgalka iyo natiijadii ka dhalatay.
Ilaa hadda, ma jiraan faahfaahin rasmi ah oo madax-bannaan oo xaqiijinaysa tirada askarta la la’yahay, xaaladdooda iyo khasaaraha dhabta ah ee dagaalka.
