Muqdisho (Banaadir24) — Waxaa soo baxaya walaac laga qabo in ciidamada Uganda ay ka baxaan qaybo ka mid ah gobolka Shabeellaha Hoose, taas oo abuuri karta firaaq amni haddii aan la gaarin heshiis ku saabsan dib u dhigista bixitaankooda.
Madaxweynaha Soomaaliya, Xasan Sheekh Maxamuud, ayaa booqasho ku tegay magaalada Kampala ee caasimadda Uganda, halkaas oo uu ka dalbaday dowladda Uganda inay dib u dhigto ka bixitaanka ciidamadeeda ku sugan gobolka Shabeellaha Hoose.
Goobaha ay saameyn karto bixitaanka ciidamada Uganda waxaa ka mid ah magaalooyinka iyo deegaannada istiraatiijiga ah ee Baraawe, Buulo Mareer, Qoryooley iyo Janaale, kuwaas oo muhiim u ah howlaha amniga ee gobolka.
Haddii ciidamada Uganda ay ka baxaan deegaannadaas iyada oo aan la helin qorshe amni oo beddelaya doorkooda, waxaa dhalan kara firaaq amni oo saameyn ku yeelan kara xasilloonida gobolka iyo dadaallada lagula dagaallamayo Al-Shabaab.
Inkasta oo dowladda Soomaaliya ay dooneyso in bixitaanka ciidamada dib loo dhigo, haddana waxaa taagan su’aal muhiim ah oo ku saabsan mowqifka Kampala: Uganda ma diyaar ayay u tahay inay sii joogto Soomaaliya, mise waxay ku adkeysan doontaa qorshaha bixitaanka ciidamadeeda?
Jawaabta su’aashaas ayaa saameyn ku yeelan karta qorshaha amniga ee koonfurta Soomaaliya iyo mustaqbalka howlgalka ciidamada Midowga Afrika ee dalka ka howlgala.
