Muqdisho (Banaadir24) — Kooxo hubeysan oo la rumeysan yahay inay yihiin burcad-badeed Soomaali ah ayaa afduubtay doon kalluumeysi oo laga leeyahay dalka Iiraan, taas oo ku sugneyd xeebaha waqooyi-bari Soomaaliya, gaar ahaan meel u dhow degmada Bandarbayla ee gobolka Bari.
Doonida oo lagu magacaabo Azini ayaa la afduubtay 29-kii October 2026, xilli ay ku sugneyd inta u dhexeysa magaalooyinka xeebaha ah ee Bandarbayla iyo Xaafuun, sida ay sheegeen warbixinnada la xiriira dhacdadan.
Sida ay ku warrantay warbaahinta The New Arab oo soo xiganeysa wakaaladda wararka AFP, siddeed nin oo hubeysan ayaa markii hore gudaha u galay doonta, iyagoo awood kaga qabsaday laba ilaalo oo Soomaali ah ee la socday. Afar nin oo kale ayaa markii dambe ku biiray kooxda, taasoo tirada burcad-badeedda ka dhigeysa 12.
Waxaa la sheegay in doonta ay saarnaayeen 21 shaqaale oo u dhashay Iiraan iyo laba muwaadin Soomaali ah oo ahaa ilaalo. Ilaa hadda si rasmi ah looma xaqiijin xaaladda badqabka shaqaalaha doonta.
Xarunta Badaha Hindiya ee Midowga Yurub (MSCIO) ayaa digniin ka soo saartay afduubka, iyadoo sheegtay in burcad-badeeddu ay doonta Azini u adeegsan karaan markab saldhig u noqda weerarro kale oo lagu qaado maraakiibta isaga kala goosha Badweynta Hindiya.
Warbixinta ayaa sidoo kale sheegtay in doontu ay u dhaqaaqeysay dhanka marin ay maraan maraakiibta ganacsiga, arrintaas oo sare u qaadday walaaca laga qabo amniga maraakiibta ku sugan xeebaha Soomaaliya.
Hawlgalka ciidamada badda Midowga Yurub ee ATALANTA ayaa baaraya dhacdadan, waxaana maraakiibta ka howlgasha aagga lagu boorriyey inay muujiyaan feejignaan dheeraad ah.
Afduubkan ayaa noqonaya kii saddexaad ee lagu qaado doonyaha kalluumeysiga ee laga leeyahay Iiraan tan iyo bishii July, iyadoo ugu yaraan 15 weerar oo la xiriira burcad-badeednimo laga soo sheegay xeebaha Soomaaliya tan iyo bishii April 2026, tiradii ugu badneyd tan iyo sannadkii 2013.
