Muqdisho (Banaadir24) — Kooxda Al-Shabaab ayaa sheegtay in diyaaradaha dagaalka ee Turkiga ay duqayn ka fuliyeen goob ku taalla duleedka deegaanka Leego ee gobolka Shabeellaha Hoose, halkaas oo sida ay kooxdu sheegtay lagu hayay maxaabiis ka tirsan ciidamada dowladda Soomaaliya oo dhaawacyo qaba.
War kasoo baxay kooxda, ayay ku sheegeen in duqayntu ay haleeshay goob si ku-meel-gaar ah loogu dabiibayay askar lagu qabtay dagaalkii ka dhacay deegaanka Jameeco ee gobolka Shabeellaha Hoose.
Al-Shabaab ayaa sheegtay in goobtaasi lagu hayay 15 askari oo dhaawac ah, kuwaas oo ay ku tilmaantay xubno ka tirsan ciidamada Gorgor ee Turkigu tababaray.
15 maxbuus oo la sheegay inay ku dhinteen duqaynta
Sida lagu sheegay bayaanka kooxda, saddex gantaal ayaa ku dhacay goobta ay ku sugnaayeen maxaabiista dhaawacantay. Al-Shabaab ayaa ku andacootay in 12 askari ay goobta ku dhinteen, halka saddex kale oo dhaawacyo culus qaba ay markii dambe u dhinteen dhaawacyadii soo gaaray.
Kooxdu waxay sidoo kale baahisay sawirro ay ku sheegtay inay yihiin maydadka askartii ku dhimatay duqaynta. Hase yeeshee, sheegashada ku saabsan tirada dhimashada, goobta la duqeeyay iyo cidda fulisay weerarka ayaan weli si madax-bannaan loo xaqiijin.
