Baydhabo (Banaadir24) — Ciidanka Xoogga Dalka Soomaaliyeed, gaar ahaan Kumaandooska Gorgor, ayaa howlgal qorsheysan ka fuliyey deegaanka Hinshiloole ee gobolka Baay, kaas oo u dhexeeya magaalada Baydhabo iyo deegaanka Deynuunay.
Howlgalka ayaa si gaar ah loogu bartilmaameedsaday maleeshiyaad ka tirsan kooxda Al-Shabaab oo la sheegay inay ku urursanaayeen deegaankaas, iyadoo ciidamada ay weerar ku qaadeen goobta ay ku sugnaayeen.
Saraakiisha hoggaaminaysay howlgalka ayaa xaqiijiyey in intii uu socday la dilay laba ka mid ah maleeshiyaadka, halka mid kale nolosha lagu qabtay.
Howlgalka waxaa si wadajir ah u fuliyey cutubyo ka tirsan Ururrada 171-aad iyo 175-aad ee Guutada 17-aad, Qaybta 1-aad ee Ciidanka Xoogga Dalka Soomaaliyeed, kuwaas oo howlgallo qorsheysan ka wada deegaannada gobolka Baay.
Howlgalkan ayaa qayb ka ah dadaallada ciidamada dowladda ay ku beegsanayaan maleeshiyaadka Al-Shabaab ee ku sugan deegaannada gobolka Baay.
Banaadir24 — Wararka Soomaaliya iyo wararkii ugu dambeeyey.
