Istanbuul (Banaadir24) – Wasiirka Wasaaradda Caddaaladda iyo Arrimaha Dastuurka Xukuumadda Federaalka Soomaaliya, Xasan Macallin Maxamuud, ayaa maanta magaalada Istanbuul ee dalka Turkiga kulan gaar ah kula yeeshay dhiggiisa Turkiga, Akın Gürlek.
Kulanka ayaa diiradda lagu saaray xoojinta iskaashiga labada dal ee dhinacyada caddaaladda iyo garsoorka, dembi-baarista, horumarinta waxbarashada sharciga iyo casriyeynta nidaamyada caddaaladda iyadoo la adeegsanayo teknoolojiyadda.
Labada wasiir ayaa sidoo kale ka wada hadlay sidii kor loogu qaadi lahaa aqoonta iyo xirfadaha bahda caddaaladda, loona xoojin lahaa is-weydaarsiga khibradaha iyo aqoonta labada dal.
Xasan Macallin ayaa magaalada Istanbuul u jooga ka qeybgalka Shirweynaha Caalamiga ah ee Caddaaladda, iyadoo kulankan uu qeyb ka yahay dadaallada lagu sii xoojinayo xiriirka iyo iskaashiga Soomaaliya iyo Turkiga.
