Muqdisho (Banaadir24) — Dowladda Soomaaliya iyo dalka Algeria ayaa ka wada hadlay xoojinta xiriirka ganacsi iyo iskaashiga dhaqaale ee labada dal, iyadoo la doonayo in la ballaariyo fursadaha ganacsi iyo suuq-geynta badeecadaha.
Safiirka Jamhuuriyadda Federaalka Soomaaliya u fadhiya Algeria, Mudane Yuusuf Axmed Xasan, ayaa kulan la yeeshay Wasiirka Ganacsiga Dibadda iyo Dhiirrigelinta Dhoofinta Algeria, Prof. Kamaal Ruzeeq, kaas oo diiradda lagu saaray sidii loo xoojin lahaa iskaashiga dhaqaale ee labada dowladood.
Kulanka ayaa si gaar ah loogu falanqeeyay kordhinta suuq-geynta badeecadaha Algeria ee Soomaaliya, sahminta fursadaha dhoofinta iyo sidii badeecadaha Algeria ay uga jawaabi lahaayeen baahiyaha ka jira suuqa Soomaaliya.
Sidoo kale, labada dhinac ayaa isla soo qaaday qorshaha lagu dhisayo Golaha Ganacsiga Soomaaliya iyo Algeria, kaas oo la filayo inuu fududeeyo xiriirka ganacsatada, dhiirrigeliyo maalgashiga iyo hindisayaasha wadajirka ah, isla markaana abuuro fursado cusub oo ganacsi.
Wada-hadalladan ayaa qayb ka ah dadaallada lagu xoojinayo xiriirka diblomaasiyadeed iyo iskaashiga dhaqaale ee Soomaaliya iyo Algeria, iyadoo labada dal ay sahminayaan fursado ay ku ballaariyaan is-weydaarsiga badeecadaha iyo xiriirka ganacsatada.
