Wasaaradda Cadaaladda iyo Arrimaha Dastuurka XFS oo ka duulaysa mabaadiida Guud ee Cadaaadda isla markaana xiganaysa Qodobka 122aad ee Dastuurka Jamhuuriyadda Federaalka Soomaaliya iyo Qodobka 51aad ee Xeer-nidaamiyaha Sharciga Nidaamka Xukuumadda, Xeer Ra’iisul Wasaare Lr. 174, ee soo baxay 15 Febraayo 2025, waxa ay soo saartay habraaca DIIWAANGELINTA MA’DUUNKA IYO FULINTA GUURKA
Ujeeddada habraaca ayaa ah:
1. Nidaaminta diiwaangelinta, tababbarka, rukhsad-siinta iyo kormeerka Ma’duunnada, iyo habraaca fulinta, xaqiijinta iyo diiwaangelinta guurka.
2. Habraacan wuxuu khuseeyaa Ma’duunnada iyo hay’adaha dawladda ee leh awood ama waajibaad la xiriira diiwaangelinta iyo rukhsad-siinta Ma’duunnada, fulinta guurinta, xaqiijinta guurka iyo diiwaangelinta Dhacdada Guurka.
Wasaaradda Cadaaladda iyo Arrimaha Dastuurka waxay dhammaan Ma’duunnada Soomaaliyeed ku wargelinaysaa inay iska diiwaangeliyaan Wasaraadda Cadaaladda iyo Arrimaha Dastuurka una hoggaansamaan shuruudaha iyo habraacyada lagu nidaaminayo mihnaddooda.
Sidoo kale, waxaa waajib ah in la ilaaliyo sirta iyo xogta shakhsiga ah ee la xiriirta guurka, si waafaqsan shuruucda dalka.
Habraacu waxa uu adkaynayaa in guurka uu sameyn karo Garsoore ama Ma’duun si rasmi ah uga diiwaangashan Wasaaradda Cadaaladda iyo Arrimaha Dastuurka.
Haddaba, waxaa la farayaa dhammaan muwaadiniinta Soomaaliyeed in ay raacaan habraaca ay dejisay Wasaaradda Cadaaladda iyo Arrimaha Dastuurka si xal rasmi ah loogu helo dhacdooyinka la xiriira sugitaanka guurka.
Ugu dambayn, waxaan ugu baaqaynaa bahda Garsoorka, Wasaaradaha Caddaaladda ee Dowlad-goboleedyada, Gobolka Banaadir iyo hay’adaha kale oo ay khusayso inay xoojiyaan wada-shaqaynta si looga gudbo caqabadaha ka jira sugitaanka guurka.
FG: habraaca waxaa saxiixay Wasiirka Cadaaladda iyo Arrimaha Dastuurka.
