Baydhabo (Banaadir24) — Ugu yaraan saddex askari oo ka tirsan ciidamada Daraawiishta Koonfur Galbeed ee daacadda u ah madaxweynaha maamulkaas, Cabdicasiis Xasan Maxamed (Laftagareen), ayaa la soo sheegayaa in lagu dilay duqeymo cirka ah oo la tuhunsan yahay inay fuliyeen diyaaradaha dagaalka Turkiga, kuwaas oo habeenkii Arbacada ka dhacay deegaanno ku dhow degmada Berdaale ee gobolka Bay.
Ilo dhinaca amniga ah ayaa sheegaya in duqeymaha lala beegsaday goobo ay ku sugnaayeen ciidamada taageera Laftagareen. Wararka hordhaca ah ayaa tilmaamaya in saddex askari ay ku dhinteen weerarradaasi.
Ilaa hadda lama oga tirada askarta ku dhaawacantay duqeymaha iyo khasaaraha kale ee ka dhashay weerarka. Sidoo kale, ma jiro faahfaahin madax-bannaan oo xaqiijinaysa cidda fulisay duqeymaha iyo bartilmaameedyada rasmiga ah ee la weeraray.
Dhacdadan ayaa kusoo beegmaysa xilli ay sii xoogaysanayaan xiisadaha siyaasadeed iyo kuwa amni ee ka jira maamulka Koonfur Galbeed, iyadoo ay jiraan walaac laga qabo in xaaladdu uga sii darto gobolka Bay.
Ilaa hadda ma jiro war rasmi ah oo faahfaahin dheeraad ah ka bixiyey dhacdadan.
