Warar cusub ayaa sheegaya in magaalada Baydhabo laga wado diyaar-garow ciidan oo la xiriira hawlgal la qorsheynayo in lagu qaado ciidamada taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen, kuwaas oo ku sugan duleedka magaalada.
Sida xogaha la helayo tilmaamayaan, kulan xalay ka dhacay Baydhabo ayaa looga hadlay qorshaha hawlgalka, iyadoo la sheegay in lagu diyaarinayo in ka badan 2,000 askari, gaadiid dagaal iyo taageero dhinaca cirka ah. Hawlgalka ayaa la sheegay inuu hoggaaminayo Taliyaha Qaybta 60-aad ee Ciidanka Xoogga Dalka, G/Sare Isxaaq Bardaale.
Qorshaha ayaa sidoo kale la sheegay inuu qeyb ka yahay diyaarinta ambalaasyo iyo gurmad caafimaad, iyadoo Muqdisho laga codsaday saddex diyaaradood oo helicopter ah si loogu daadgureeyo dhaawacyada haddii uu dagaal ka dhaco goobaha la qorsheeyay.
Wararka ayaa intaas ku daraya in laba urur oo ka tirsan ciidamada Gorgor iyo gaadiidkooda dagaalka loo qorsheeyay in Baydhabo la geeyo maanta iyo berri. Sidoo kale, waxaa la sheegay in duulimaadyo sida ciidamo, hub, rasaas iyo gaadiid dagaal ay magaalada ka degayaan.
Diyaarad xamuul ah oo lagu sheegay inay sidday gaadiid dagaal ayaa sidoo kale lagu soo warramay inay Baydhabo timid, iyadoo xogtu xustay in la qorsheeyay in la dajiyo 13 gaari, kuwaas oo kala ah 6 Beebe iyo 7 Cabdi Bile.
Diyaar-garowgan ayaa imanaya maalmo kadib dagaallo culus oo Baydhabo ka dhacay 28-kii September, kuwaas oo ay labada dhinac kala duwan ka bixiyeen warar iyo sheegashooyin iska soo horjeeda.
Haddii qorshahan uu dhaqan galo, Baydhabo ayaa wajihi karta iska horimaad cusub iyadoo xiisadda u dhexeysa ciidamada dowladda iyo xoogagga taageersan Laftagareen ay weli taagan tahay.
