Warbaahinta Turkiga ee TRHaber ayaa ku warrantay in Soomaaliya ay heshiis la gashay Pakistan si ay u hesho diyaaradaha dagaalka ee JF-17 Thunder, taas oo qayb ka noqonaysa qorshaha dib loogu dhisayo laguna casriyeynayo Ciidanka Cirka Soomaaliya.
Warbixinta ayaa sheegtay in heshiiska aan weli si rasmi ah u xaqiijin dowladaha Soomaaliya iyo Pakistan, iyadoo aan la shaacin tirada diyaaradaha, qiimaha heshiiska ama waqtiga la filayo in la keeno.
Arrintan ayaa kusoo beegmaysa kaddib booqashooyin iyo wada-hadallo ay yeesheen saraakiisha ciidamada cirka Soomaaliya iyo Pakistan, kuwaas oo diiradda saaray dib-u-dhiska Ciidanka Cirka Soomaaliya, tababarka iyo xoojinta iskaashiga difaaca.
Warbixinno hore ayaa sheegay in Soomaaliya ay kala hadlaysay Pakistan helitaanka ilaa 24 diyaaradood oo JF-17 Block III ah, balse faahfaahintaas sidoo kale weli si rasmi ah looma xaqiijin.
JF-17 Thunder waa diyaarad dagaal oo hawlo badan qabata, waxaana si wadajir ah u horumariyay Pakistan iyo Shiinaha. Haddii heshiiska la xaqiijiyo, wuxuu noqon lahaa tallaabo weyn oo ku aaddan dib-u-dhiska awoodda hawada Soomaaliya.
