Wararka laga helayo deegaanka Fafi ee gobolka Garissa ayaa sheegaya in dagaalyahanno ka tirsan Al-Shabaab ay weerar ku qaadeen xero ay ciidamada ammaanka Kenya ku leeyihiin deegaanka Dhaashooy.
Sida lagu sheegay warbixin ay baahisay warbaahinta Al-Shabaab, weerarka ayaa lagu qaaday xerada ciidamada Kenya ee deegaanka, waxaana la adeegsaday hub culus. Warbixintu waxay sheegtay in weerarka uu sababay khasaare soo gaaray ciidamada Kenya, iyadoo lagu xusay dhaawaca ugu yaraan shan askari iyo gubashada teendho sahay loogu kaydiyay ciidamada.
Hase yeeshee, wararka ka soo baxay dhinaca Kenya ee ku saabsan dhacdadan waxay sheegayaan in weerarku dhacay fiidnimadii 1-dii Oktoobar 2026, xilli maleeshiyaad looga shakisan yahay Al-Shabaab ay weerar ku qaadeen xero GSU ah oo ku taalla Fafi. Booliiska Kenya ayaa sheegay in ciidamada xerada ay iska caabiyeen weerarka, islamarkaana aysan kooxdu gudaha u gelin xerada. Hal askari ayaa lagu soo warramay inuu dhaawacmay kadib markii uu ku dhacay burbur ka dhashay gantaal RPG ah.
Dhacdadan ayaa kusoo beegmaysa xilli weerarrada iyo isku-dayada lagu beegsanayo xarumaha ciidamada Kenya ee waqooyi-bari ay yihiin arrin soo noqnoqotay. Gobolka Garissa, gaar ahaan deegaanka Fafi, ayaa horey uga dhacay weerarro dhowr ah oo lala xiriiriyay Al-Shabaab, oo ay ku jiraan weerarro lagu qaaday xeryaha ciidamada iyo booliiska.
Weerarka cusub ayaa sidoo kale muujinaya cadaadiska amni ee ka jira deegaannada ku dhow xadka Soomaaliya iyo Kenya, iyadoo ciidamada ammaanka Kenya ay muddooyinkii u dambeeyay kordhiyeen howlgallada iyo roondooyinka ka socda Garissa iyo gobollada kale ee waqooyi-bari Kenya.
