Laba sarkaal oo ka tirsanaa booliska Kenya ayaa ku dhintay qarax miino oo haleelay gaari nooca Toyota Land Cruiser ah oo ay la socdeen, xilli uu marayey waddada isku xirta Saretho iyo Dhadhaab ee gobolka Gaarisa, waqooyi-bari Kenya.
Dhacdadan ayaa dhacday abaare 6:00 subaxnimo Jimcihii, 9-ka Oktoobar 2026, sida ay sheegeen saraakiisha booliska Kenya.
Gaariga ayaa ka tirsanaa saldhigga booliska Xagardheer, waxaana la socday sarkaal sare oo booliska ka tirsan iyo darawalkiisa. Sida lagu sheegay qiimeyntii hordhaca ahayd, gaariga ayaa dul maray walxaha qarxa ee dhulka lagu aasay, taasoo sababtay dhimashada labada sarkaal. Qaraxa ayaa sidoo kale burbur xooggan gaarsiiyey gaariga.
Markii ay ciidamada ammaanku gaareen goobta, ma aysan helin dadkii ka dambeeyey weerarka. Baaritaanno ayaa la bilaabay, waxaana la xoojiyey howlgallada amniga ee deegaannada ku dhow goobta uu qaraxu ka dhacay.
Wararka la xiriira dhacdadan ayaa farta ku fiiqaya maleeshiyaadka Al-Shabaab ama kooxo deegaanka ka taageera inay ka dambeeyeen miinada, taasoo la rumeysan yahay in habeenkii ka horreeyey weerarka la dhigay. Hase yeeshee, weli si rasmi ah looma xaqiijin cidda fulisay qaraxa.
Weerarkan ayaa kusoo beegmaya iyadoo ciidamada Kenya ay howlgallo amni ka wadaan gobolka, halkaas oo horay uga dhaceen weerarro miinooyin lagu beegsaday ciidamada ammaanka iyo saraakiisha dowladda.
Bishii Luulyo ee sanadkan, lix xubnood oo ka tirsanaa ciidamada ammaanka Kenya ayaa lagu dilay gobolka Mandera, kadib markii gaarigii ay saarnaayeen uu dul maray miino, dabadeedna la weeraray. Shan ka mid ah waxay ka tirsanaayeen cutubka sida gaarka ah u tababaran ee lagu magacaabo (SOG), halka sarkaalka lixaad uu ahaa xubin ka tirsan kaydka booliska qaranka Kenya.
Baaritaannada ku saabsan qaraxii ugu dambeeyey ayaa weli socda, iyadoo ciidamada ammaanka ay isku dayayaan inay aqoonsadaan dadkii ka dambeeyey weerarka.
