Muqdisho (Banaadir24) — Warar laga helayo ilo amni ayaa sheegaya in Aadan Madoobe uu deggen yahay Hotel Decale oo ay maamusho dowladda Turkiga, kuna dhex yaalla xarunta garoonka diyaaradaha Aadan Cadde ee Muqdisho.
Banaadir24, ayaa ogaatay in Aadan Madoobe uu hotelka kulamo aan si rasmi ah loo shaacin kula yeeshay wakiillo ka socda hay’ado caalami ah, oo ay ku jirto Qaramada Midoobay (UN). Kulamadaas ayaa la sheegay in si hoose loo qabtay, iyadoo la sheegay in laga cabsi qabo in shaacintoodu ay caro ka dhaliso ciidamada Daraawiishta Koonfur Galbeed ee taabacsan Cabdicasiis Laftagareen iyo qaybo ka mid ah bulshada Koonfur Galbeed.
Dhanka kale, ilo xog-ogaal ah ayaa tilmaamaya in inta badan mas’uuliyiinta sare ee maamulka Aadan Madoobe ay haatan ku sugan yihiin Muqdisho, marka laga reebo afhayeenkiisa iyo mas’uuliyiin ka tirsan laamaha amniga gudaha.
Arrintan ayaa kusoo beegmaysa xilli ay sii kordhayaan hubanti la’aanta siyaasadeed iyo walaaca amni ee ka jira magaalada Baydhabo, oo ah xarunta maamulka Koonfur Galbeed.
Joogitaanka mas’uuliyiinta maamulka ee Muqdisho ayaa dhalinaya su’aalo ku saabsan awoodda maamulkoodu u leeyahay inuu Baydhabo ka sii wato shaqadiisa iyo inuu gacanta ku hayo xarumaha awoodda, iyadoo ay taagan yihiin xiisado u dhexeeya dhinacyada siyaasadeed iyo kuwa amni ee iska soo horjeeda.
