BELEDXAAWO (Banaadir24) – Ciidamada maamulka Jubbaland ayaa la sheegay inay gudaha u galeen magaalada Beledxaawo ee gobolka Gedo, halkaas oo sida xogta la helay ay tilmaamayso lagu wareejiyey gacan-ku-haynta amniga iyo maamulka degmada.
Tallaabadan ayaa imanaysa xilli ay Beledxaawo muddooyinkii dambe ka taagnaayeen xiisado siyaasadeed iyo kuwo ciidan oo la xiriira loollanka u dhexeeya Dowladda Federaalka Soomaaliya iyo maamulka Jubbaland ee gobolka Gedo.
Wararka laga helayo degmada ayaa sheegaya in shacabka qaarkood ay soo dhaweeyeen ciidamada, iyadoo isbeddelkan uu saameyn ku yeelan karo xaaladda amni iyo maamulka magaalada.
Beledxaawo ayaa muddo dheer ahayd goob ay isku hayaan dhinacyada siyaasadda iyo ciidamada ee ku kala aragti duwan maamulka gobolka Gedo. Xiisadahaas ayaa marar kala duwan sababay isku-dhacyo hubeysan iyo dhaqdhaqaaqyo ciidan.
Si kastaba ha ahaatee, faahfaahinta rasmiga ah ee ku saabsan cidda wareejisay maamulka, qaabka ay ku dhacday wareejintu iyo xaaladda amniga ee magaalada weli waxay u baahan yihiin xaqiijin dheeraad ah.
Banaadir24 Online ayaa la soconaysa wararkii ugu dambeeyey ee ka soo kordha xaaladda Beledxaawo.
